– విజ‌య‌వాడ ప‌శ్చిమ‌లో 32వేల ఓట్లు

– కూట‌మి నేత‌లు ప్రాధాన్యం ఇవ్వ‌క‌పోవ‌డం త‌గ‌దు

– టీడీపీ ఎన్టీఆర్ జిల్లా కార్య‌ద‌ర్శి, న్యాయ‌వాది పిళ్లా శ్రీ‌నివాస‌రావు ఆగ్ర‌హం

అమ‌రావ‌తి టుడే ప్ర‌తినిధి : విజ‌య‌వాడ ప‌శ్చిమ నియోజ‌క‌వ‌ర్గంలో అత్య‌ధిక ఓటింగ్ ఉన్న న‌గ‌రాల సామాజిక వ‌ర్గానికి కూట‌మి నేత‌లు స‌రైన ప్రాతినిధ్యం క‌ల్పించ‌క‌పోవ‌డం త‌గ‌ద‌ని టీడీపీ ఎన్టీఆర్ జిల్లా కార్య‌ద‌ర్శి, న్యాయ‌వాది పిళ్లా శ్రీ‌నివాస‌రావు ఆగ్ర‌హం వ్య‌క్తం చేశారు. ఈమేర‌కు ఆయ‌న సీఎం చంద్ర‌బాబుకు బ‌హిరంగ ప్ర‌క‌ట‌న విడుద‌ల చేశారు. పశ్చిమ నియోజకవర్గంలో నగరాల సామాజిక వర్గానికి రాజకీయంగా అన్యాయం జరుగుతోందని, టీడీపీ ఆవిర్భావం నుంచి పార్టీ కోసం నిబద్ధతతో పనిచేస్తున్న తమ వర్గానికి తగిన గుర్తింపు ఇవ్వ‌డం లేద‌ని వాపోయారు. గతంలో నగరాల సామాజిక వర్గానికి చెందిన నాయకులు పశ్చిమ నియోజకవర్గం నుంచి ఐదుసార్లు ఎమ్మెల్యేలుగా గెలిచారని, ప్రస్తుతం నియోజకవర్గంలో తమ వర్గానికి 32 వేలకుపైగా ఓట్లు ఉన్నాయని పేర్కొన్నారు. అయినప్పటికీ కూటమి నాయకత్వం తమకు తగిన రాజకీయ ప్రాధాన్యత కల్పించడం లేదని విమర్శించారు. విశాఖపట్నంలో తమ వర్గానికి ప్రాధాన్యత ఇస్తున్నప్పుడు విజయవాడలో ఎందుకు వివక్ష చూపుతున్నార‌ని ఆయ‌న‌ ప్రశ్నించారు. తమ మద్దతుతో గెలిచిన నాయకుడు హామీ ఇచ్చిన వెయ్యి గజాల స్థలాన్ని ఇప్పటివరకు కేటాయించలేదని ఆరోపించారు. నగరాల సంక్షేమ, అభివృద్ధి కార్పొరేషన్ చైర్మన్ పదవిని ఏడాదిగా భర్తీ చేయకపోవడం పట్ల అసంతృప్తి వ్యక్తం చేశారు. తమ సామాజిక వర్గానికి జనాభా, ఓటు బలానికి అనుగుణంగా రాష్ట్రస్థాయి రాజకీయ ప్రాధాన్యత, నామినేటెడ్ పదవుల్లో అవకాశాలు కల్పించాలని శ్రీ‌నివాసరావు డిమాండ్ చేశారు.

Views: 154