అమ‌రావ‌తి టుడే ప్ర‌తినిధి :

ఆంధ్రప్రదేశ్ రాష్ట్ర ప్రభుత్వం ప్రతిష్టాత్మకంగా నిర్వహిస్తున్న స్వచ్ఛ ఆంధ్ర అవార్డ్స్–2026లో భాగంగా ఎన్టీఆర్ జిల్లాలోని ప్రముఖ పర్యాటక కేంద్రం భవాని ఐలాండ్‌కు స్వచ్ఛ ఆంధ్ర అవార్డు–2026 లభించింది. విజయవాడలోని తుమ్మలపల్లి కళాక్షేత్రంలో నిర్వహించిన స్వచ్ఛ ఆంధ్ర అవార్డ్స్–2026 కార్యక్రమంలో ఎన్టీఆర్ జిల్లా కలెక్టర్ డాక్టర్ జి. లక్ష్మీ షా, ఐఏఎస్, విజయవాడ నగరపాలక సంస్థ కమిషనర్ శ్రీ ధ్యాన్ చంద్, ఐఏఎస్, ఎమ్మెల్సీ శ్రీ వర్ల రామయ్య చేతుల మీదుగా జిల్లా పర్యాటక శాఖ తరఫున జిల్లా పర్యాటక అధికారి డాక్టర్ కొల్లేటి రమేష్ అవార్డును అందుకున్నారు. భవాని ఐలాండ్‌లో పరిసరాల పరిశుభ్రత, స్వచ్ఛత, తాగునీటి సదుపాయాలు, మరుగుదొడ్ల నిర్వహణ తదితర అంశాల్లో ప్రత్యేక శ్రద్ధ తీసుకోవడంతో పాటు, పర్యాటకులకు ఆహ్లాదకరమైన మరియు పరిశుభ్రమైన వాతావరణాన్ని అందిస్తూ పర్యాటకులను విశేషంగా ఆకర్షిస్తున్నందుకు ఈ అవార్డును ప్రదానం చేసినట్లు జిల్లా పర్యాటక అధికారి డాక్టర్ కొల్లేటి రమేష్ తెలిపారు. పర్యాటక కేంద్రాల్లో పరిశుభ్రతకు అత్యంత ప్రాధాన్యత ఇస్తూ, స్వచ్ఛమైన పర్యాటక ప్రదేశాలు – ఆకర్షణీయమైన పర్యాటక అనుభవాలు అనే లక్ష్యంతో మరిన్ని చర్యలు చేపడతామని ఆయన తెలిపారు. భవాని ఐలాండ్‌కు స్వచ్ఛ ఆంధ్ర అవార్డు లభించడం పట్ల జిల్లా పర్యాటక అధికారి డాక్టర్ కొల్లేటి రమేష్ జిల్లా కలెక్టర్ డాక్టర్ జి. లక్ష్మీ షా ఐఏఎస్‌కు ప్రత్యేక కృతజ్ఞతలు తెలిపారు. జిల్లా యంత్రాంగం అందిస్తున్న సహకారం, మార్గదర్శకత్వంతో ఎన్టీఆర్ జిల్లాలో పర్యాటక అభివృద్ధి, పరిశుభ్రత కార్యక్రమాలను మరింత ముందుకు తీసుకెళ్తామని ఆయన పేర్కొన్నారు.

Views: 1232