59 సంవత్సరాల తరువాత రెండోసారి కలిసిన పూర్వ విద్యార్ధులు
అమరావతి టుడే ప్రతినిధి:
విజయవాడ డాక్టర్‌ ఎన్‌ఆర్‌ఎస్‌ ప్రభుత్వ ఆయుర్వేద కళాశాల, బీఏఎంఎస్‌ తొలి, రెండో బ్యాచ్‌ల పూర్వ విద్యార్థుల అలుమ్ని మీట్‌–2026 ఘనంగా జరిగింది. విజయవాడలోని సత్యనారాయణపురం శ్రీ గాయత్రి కన్వెన్షన్‌ హాల్‌లో ఆదివారం నిర్వహించిన ఈ ఆత్మీయ సమ్మేళనంలో పూర్వ విద్యార్థులు పాల్గొని తమ పాత జ్ఞాపకాలను నెమరువేసుకున్నారు. ఎన్నో ఏళ్ల తర్వాత ఒకచోట చేరిన పూర్వ విద్యార్థులు పరస్పరం ఆత్మీయంగా పలకరించుకుంటూ ఆనందంగా గడిపారు.ఈ కార్యక్రమానికి ముఖ్య అతిథిగా ఆయుష్‌ శాఖ మాజీ అదనపు సంచాలకుడు డాక్టర్‌ కె. నరసింహారెడ్డి హాజరయ్యారు. గౌరవ అతిథులుగా నేషనల్‌ మెడికల్‌ అసోసియేషన్‌ (ఎన్‌ఎంఏ), ఆంధ్రప్రదేశ్‌ అధ్యక్షుడు, ఐఎంపీసీఓపీఎస్‌ డైరెక్టర్‌ డాక్టర్‌ బి. భాను ప్రకాష్, కళాశాల ప్రిన్సిపాల్‌ డాక్టర్‌ టి. బుల్లయ్య పాల్గొని మాట్లాడారు. 59 సంవత్సరాల తరువాత ఇక్కడ మరోసారి కలవటం ఆనందంగా ఉందని అన్నారు.

ఈ సందర్భంగా పూర్వ విద్యార్థులు కళాశాలలో చదువుకున్న రోజులను గుర్తుచేసుకుంటూ తమ అనుభవాలను పంచుకున్నారు. విద్యాభ్యాస సమయంలో ఏర్పడిన స్నేహబంధాలు, గురువులతో అనుబంధం, వత్తిపరమైన ప్రయాణంలోని అనుభవాలను గుర్తుచేసుకున్నారు. పూర్వ విద్యార్థుల మధ్య పరస్పర సంబంధాలను మరింత బలోపేతం చేసుకోవడానికి ఈ సమ్మేళనం వేదికగా నిలిచింది.కార్యక్రమం కోఆర్డినేటర్‌ డాక్టర్‌ చల్లా హరికుమార్‌ మాట్లాడుతూ ఎన్నో పనివత్తిడిలు ఉన్నప్పటికీ ఇక్కడ సమావేశానికి వచ్చి ఉత్సాహంగా గడిపిన స్నేహితులకు కృతజ్ఞతలు తెలిపారు. తరచూ కలుసుకోవటంతో పాటు తోచినంతలో సేవాకార్యక్రమాలు నిర్వహించాలని అన్నారు. కార్యక్రమంలో డాక్టర్‌ ఎం. దినకర శర్మ, డాక్టర్‌ కె. అమృత్‌ కుమార్‌ చంద్‌ కీలక పాత్ర పోషించారు. పూర్వ విద్యార్థులందరూ కలిసికట్టుగా ఉత్సాహంగా పాల్గొనడంతో పండుగ వాతావరణం కనిపించింది. అలుమ్ని మీట్‌ ఆత్మీయ వాతావరణంలో విజయవంతంగా ముగిసింది.

Views: 168